KAPIL NO YIRDU:N ?
Oboni Mili
Ghy-36
Bapukonbí lo:dém e:g poro:gém mo:kege:la tégla bepar moné tanié. Silo Bapukonké érangé Dodgangém pudung. Bapukonbí rínna lé:nam e:g kídardok dortapagné yegradém rokompé solenbomla e:g mankapé gíkumsuné midum kídarém dumsula dibangki monam sepadokki egdém manpé émla linggudok seppingela angkédem katokki pakurgela dibangki monam yapadékki yegmandém manpé idagdo egdé bím ngesal kanggela yirkang.
Bapukonbí e:gdok yirnamdém ka:pa:sula bí e:gdém ludung, “Silo ngolukké siné ta:ni kidar kídí:lok Dodgang uyo: Ngolu silo siné takamém amin mintomla a:dor-a:dorko e:ggém yegmaném mantérye. Nok meko:lodém urom apin bido:do mintomla bipayé, no édé agomdém kingelasin ngom kanggela kapil yirkan ?
Bapukonké agomdém tatgela e:gdé ludung “Ngo:tu no:luk ta:ni binam do:ngo-tí:ngong odokké lené-nu:né po:yogngém dola-tí:la turra dunngai, dépigelasin silo ngok sidagso sékkídíko ngasod-ngayodla sinamsém sipa:dung. Silo siné ta:niyém lugéla turpé-turpé bo:jérungko e:g porog jio:m mokeyé, édé ji:o mokenam pap kídídém Donyi Po:lo, Sedi Melo, Ésar Pédong bulupag kala dung. Odokké no lo:dém e:g poroggém mopedla tegla kola bepar mola dung édé papkídídém sitragupta bí:pag adgabla dung.
Nolugom sido:do Jombí éddíko nolum ngasod-ngayoddopé guné tulalo ra:la
mojir-momarla iyejin, Nolu ídík kappa:yéji édé adídék agomdémna mé:la-mé:la ngo yirdu:né !!
Mising Anu Lutad, Mars, 2025
