Mising Anu Lutad, Ghunasuti, 23 November 2024: Silo bagémpé Mitom Jugen Taid-ké okumlo bím ka:ríksukolo gíka: Mising opínsok ménggé tadgénam Adné pané ope:éla: Mitom Jugen Taidmé aipé ainang ara:bok mí:boné ope:é. Atképé Gugamukh, Lokhimpur, Dhokuakhona mo:léglok kérang kétakpé du:né kídíngé silo mitom Jugen Taid-ké okumlo bím ka:ríksuka.
Mitom Jugen Taid-ké ékéré ésa:ma:pé du:namé bojerungko ika:bong. Asin ansiné misingé, mé:jo mé:labné misingé mitom Jugen Taid-ké ékér ésa:ma:nam lutadém tatpa:sudaggdokké takam adné pané ope:élang bím aipé mí:boné ope:é bím ka:dumsunam a:ng agomko po:pékéboi mé:la du:ngai émdaggom lékoné Misingé rélékpé bíkké ékrém ka:ríksunam légangé silo bagémpé bíkké Ghunasuti mo:léglo du:né okumlo gíla bím ésang anpo ékér agom do:yingém lupomínsuka.
Kila ramla du:né tani:ém luyum lupola ayangki du:bo dagbomílo anupé turrané angko pa:ladlangkula bojeko mé:po sakpola du:doku émna pinnyo burné mé:ji:né ami:é lugé:la gítung. Dépila édé a:ngdém mitomké angkéng ara:do írga:monam léga:pé silo mising opínlok tadgénam Adné pané ope: odokké Mitom Jugen Taidmé asin ara:bok aipé mé:boné ope:é Gugamukh abotani lottalokké rélékpé bíkké okumlo:pé gíla ka:ríksuka.
“Tani:é tani: léga:pé” ainang obomínsunam angki takam misingéi siyum siro ngasodyemílo ka:dumsunamém social media atílo ka:begdung. Édé airupéi ainé agomé. Édémí:pí silo bangkí bangkílok adné pané ope: odokké mitom Jugen Taidmé aipé mí:boné ajon arumé gíla: ka:ríksuka.
Mitom Jugen Taid-ké ékér ésa:ma:pé du:nam lutadém tatpa:sudag lédupé lígémpé adné pa:né ope:é “social media WhatsApp Group-ko - Help for Jugen Taid” émna la:lengela appíngé ayang aboki abar banrnyi ma: murkongém bidumsula bík kinam ka:sunamdo ajjoukodaggom ngasod angko ngasarsulayépé émna mé:jubla mé:jo mé:labné ope:é bidumsuka. Dé bidumsunam mé:po ayang payegdém bomna silo adné ope:éla: bím mí:boné ope:é ka:ríksukolo gíka:
Asiné mé:po mé:nganla du:mílo kinam ramnamé yogdo. Dépila silo migya:bokodaggom adné pané ope:é mé:tom alangki aki bí:moné agom do:yingém bojeko Mitom Jugen Taid-ké okumlo kíbomínsula mé:po ménganla yirbokamínsuka émna kinla:dung
