Mising Anu Lutad, Majuli, 16 Julai :- Mising opínnok abu: kébang Mising Ba:né Kéba:lok 100 (língkoné) dítag moí:rrobnam ager tarungém mélokíddí Majuli mo:dumlok Gejera do:lulo Sri Sri Pitambor Debo Guswami lotta:lo í:r pongkírpé ager tarungém irobdung.
Silo lo:nyi longésok ager taru:do rokom 6.30 adído Mising Ba:né Kébangké dítag língko ba:len mé:pang léga:pé língko amíngko ísíng legotka MBK lok Kébang Abu Mg. Paramananda Chayengiya-bí.
Rokom 8.30 adído Opín kéba:lok Lé:tom tomsar ager tarungém ika. Édé opín kéba:dok lé:tom tomsarnam agerkírídém aí aíké opín kéba:lok kébang abu kídingé opín lé:tom tomsarnam ager tarungém ika.
Rokom 9.00 adído TMPK lok kébang abu Tilok Doley-bí Mé:pang Kumtomém kumgurgela ngolukké Mising opínnok dolod tí:lotki Pinkang donam tarungém Milíg kébang bangkolo doka.
Mising Ba:né Kébangém dítag 1924 dok 17 longkí-do do:pínlok tadgénam Majuli mo:dumlok Gejera do:lulo ba:lenka. Misingké mé:tinsunam kébangé sinnyingké 2023 dítakso 100 (língko) dítakkopé ika:bong. Ba:lendokkébo Mising Ba:né Kébangé mising réngamsok ainam légapé réngam-murkéng, dírbí-dírlab, réngam-moyinsunam odokké ainé kin-go kalod atí atí appíng mising réngamlok ngasod-ngayodém kéralokké ka:si mosila ka:bomna igé-gígébomna agerém gerra dung.
Mising opínsok pu:po jarpo:monam léga:pé appíng Mising opin kébangé lékkopé ír pongkírpé ka:dum gídumsula Mising Ba:né Kébangké Dítag língko moí:rnam ager tarungém idung.
