Mising Anu Lutad, Gugamuk, 23 Julai :- Asom mimosokké aipé amin gíné Doksiri e lusar opeyé sílo Dhemaji mo:dumlok Gugamuk Abotani lotta:lo longé ager tarungki Doksiri Tagnyi:né ba:len Tarung "দকচিৰি দ্বিতীয় বৰ্ষপূৰ্তি অনুষ্ঠান" ém írga:pé ba:to.
Doksiri Tagnyi:né ba:len Taru:do Mé:tomo:ki mo:písém unjerra du:monam léga:pé Doksiri ope:é "Doksiri Mé:tom ponam" tarungkosin Anupé ru:lengela siloké sé Tagnyi:né ba:len taru:sém "TAGNYI:NÉ BA:LEN TARUNG ÉLA: DOKSIRI MÉ:TOM POKAN TARUNG" émna mintégla mé:tom ponam ager tarungém ika.
Mising Agom Kéba:lok po:péké Abu oi Migang Gubin Noro-ké Kébang Abu tedgurki Doksiri opeyé anupé ru:lennam "Doksiri Mé:tom ponam" taru:dém Mising Agom kéba:lok Abu oi Gomlab migang Kalinath Panggíng-bí dunggurla í:r porngkírpé iboto.
Doksiri Tagnyi:né ba:len taru:dok Doksiri Julai po:lo:dok online e lusardém Mising Agom Kéba:lok Nébíng ame:, NCDC kolej-lok ru:tum Dr. Surojit Dole:bí tamsarbika.
Dr. Doley-bí lusardém tamsarbigela Magazine-lok lukéng agomém naré téttépé lubigela su:k anu adí:so Doksiri-sémpiné e lusar ager gernamsé airupé ainé ageré émna lubito. Sémpiné tébégné agerém Doksiri ope:yé geryarbompé lagidag émna Dr. Doley-bí asin asé:líkka. Mising agom gomlabsém e mo:pílo langkumsula mésila ménam léga:pé Doksiri nébíng Tapan Lal-bulu togamdanna gernamsém ngo airupé mé:líksudung. Doksiri opeyé la:leníkampé ngolukké sí:sang opeyésin édémpiné e lusarém la:lenmílo aido émna lubika.
Doksiri mé:tom ponam taru:do asom mimosok tadgé ménggésunam mitomé gíla Doksiri Tagnyi:né ba:len Taru:dém aipé írga:moto.
Mising gomlab mo:pílok aipé adjo adlabla mé:tom adjoné mitom kídaré gíla Doksiri Tagnyi:né ba:len taru:dok Doksiri Mé:tom Ponam Taru:do ainé ainé tatpo tadanné mé:tomém pokanla réngamém mé:tomki tadyutsumoto.
Dé Doksiri Mé:tom ponam taru:do mitom-pé goglígnam mitom - Muhiram Pegu, Tuniram Medak, Bhobo Doley, Dibakor Pegu, Dusyonto Noro, Sumeswor Medak, Mrinangko Patir, Joy Prokash Pe:gu, Progress Medak, Nokul Medak, Roma Kanto Doley bulu ainé ainé tatpo tadanné mé:tomém pokanbila Doksiri tagnyi:né ba:len tarungém í:r pongkírpé ba:ledboto.
Doksiri ba:len taru:dém mintégla Osom mimong ara:lo Doksiri e lusar opeyé Mising éla: Osomiya Mé:tom atkamínsunam taru:do Mising Mé:tom kosagdo 1né amaném pa:to Mg. Jatin Mili (Jorhat Tiok), 2né amaném pa:to Mm. Meghali Medak Doley ( Dhokuakhona, Borkhamon) odokké 3né amném pa:to Mg. Digen Taíd (Majuli). Osomiya Mé:tom kosagdo 1né amaném pa:to Mm. Ilamoni Saikia (Guwahati), 2né amaném pa:to Wahid Ahmed (Qatar) odokké 3né amaném pa:to Himashree Dutta (Golaghat)
Silo Doksiri tagnyi:né ba:len taru:lo ba:lampé mitom Jatin Mili-mé mitom Bhobo Doley-ké alakki Doksiri opeyé 1né aman bika. 2né aman pa:né Meghali Medak Doley-mé MAK-lok Kébang Abu Oi Kalinath Panggíng-ké alakki 2né aman bika.
Doksiri taru:dém ai kampo:pé gomlab mé:boné réngamé gíla írga:pé ba:bogalok Nébíng Tapan Lal réngamém asin aséngko asé:líggela pola du:né sí:san opeyé ménggabdanna mé:tom, do:déng, gomsar atí atíém adlangka émna kumpangka.
