Mising Anu Lutad, 27 Epril, 2025: Mising Agom Kébang-ké gergurki silo longé ager tarungki Dhemaji mo:dumlo du:né Mising Agom Kébang gergo okumlo “Mising Agom Poyirnam Geryirsunam” Ohomiyang lugéngki lumílo (মিচিং ভাষা শিক্ষণ কৰ্মশালা) ager tarungém naré:pé ru:suka.
Édé ager taru:do Mising Agom Kéba:lokké bojerungko Pinnyo burné, Kinji:né midumé gípumsula Poyirsunam Geryirsunam tarungém ibogela:sin Pogolo Mising agomém kapé poyirpé lagidagji odokké Poyirné kídí:dok Ka:yir Potin agomémsin írga:pé ru:suka émna kinna:dung.
Migomé tolígnam “K-shreni éla: Klas 1 do Mising Ané Agomki Poyirpéné kidíngém ‘Training’ binam léga:pé ‘Master Trainer’-pé ipéné kídí:dok lédulosin MAK-é Mising Agom Poyirnam Geryirsunam tarungém ru:suka.
Siloké Poyirnam Geryirsunam taru:do MAK nébíng Mg. Sumesor Koptakké tolíkkampé MAK Abu Mg. Horinarayon Pegu-bí tedgurka.
Abíg moyinsunam odokké polod agomém 2002 dítagdokké ru:ropka odokké 2019 dítagdok Majuli mo:dumlo ba:nam MAK mirum kéba:do tosékka émna do:pín pínbito MAK-lok abu oi Mg. Probhat Mili migombí.
Pogolo poyirsuné ko:kangém kapé Poyirné kídíngé poyirpénaméji, odok anu polod agomém segrio:pé pokanbika MAK-lok Kébang Abu oi Kalinath Panggíng migombí.
Polod agomlok lenné lukér-luyer agomémsin segrio:pé luyinboka MAK-lok po:péké Nébíng Dr. Dipok Kr. Dole:bí la: MAK-lok po:péké Nébíng Dimbeswar Dole: bínnyi.
Pogolo kapé Mising agom polodém poyirpénaméji, édémbulum appíngé segrio:pé kinkurla:dopé Kalinath Panggíng, Dr. Ghono Kanto Dole:, Dusyonto Noro, Joyanta Kaman odokké Dr. Anil Pe:gubulu lujubla lubigela:sin geryirboka.
Ménggappénam Lutaddé sémpé a:péné Ponsayod balennamlok lédupé SCERT tolíkkampé anupé balennam poyirné kídí:lok Polod geryirsunam agerém geryé émna ru:sékto.
Lutettpénam lutaddé sémpé nérí:bokkébo aiyopé poriné ko:ko:néngé Mising Ané agomsém kinkurla:dopé Poyirné kídíngé Mising Agom a:ngki ménggabdanla aíké turying ageré émna mé:sula poyirlí:né kídíngém tolígnam légangésin si:lo Mising Agom Kébangé ru:suka émna kinna:dung.
Mising Anu Lutad, Epril, 2025
