Mising Anu Lutad, 21 Oktubor, 2024: Silo Mising Aíka:si:suné Milung (MAC) éla: mising opín kébang milígé gíla mimo:sok migom dungko Dispur Jonota Bhobon-lo mimo:sok ru:tum mirung Dr. Hinonto Biswo Shorma-ké lédulo kínggíruné tarungém ru:suka.
Mising Aíka:si:suné milu:sém Bharot runggo:lok Sixth Schedule-lo du:né aíké pangkamém pa:nam léga:pé ki:ni migom (Central Govt.) éla: mimong migomé lomdanna aum ope: kébangko (Tripartite Meet) ba:la mising mo:pínsok runggo pangkamém pa:langgordopé tarungém mimosok ru:tum mirung lédulo ru:suka.
Dokkésin a:péné Mising Aíka:si:suné Milu:lok milíg balenkunam manggom MAC election agomémsin ru:suka émna kinna:dung.
Ménggésunam mising opínsok igé-gígébone ope:lok opín a:ng dígnamém ka:pa:sula ru:tum mirung Dr. Himonto Biswo Shorma-bí lomdanna a:péné Nobembor po:lo ara:lo ki:ni migom lédulo tarungém ru:ségbonam agomém toríksuto.
Siloké ménggappénam ru:sunam taru:do Ohom mimo:sok kin-go mirung Dr. Ronuj Pe:gu odokké Mising Aíka:si:suné Milu:lok ru:tum Mg. Promanondo Sayengiya, MAC Abu Sunil Pe:gu, TMPK Abu Tilok Doléy, TMPK Nébíng San Do:nyi Panggíng, MBK nébíng Indro Kr. Sungkurang, MAC lok EC Johan Dole:, EC Purushottam Dole: EC Noresh Kumbang, EC Mm. Indira Chintey Kumbang, TMMK nébíng Shormila Pa:yeng bulu du:pumsula ru:sunam tarungém írgapé ru:pí:lboto émna kinna:dung.
