PA:NAM
Tuniram Médok
Atíko pa:pémílo
Mí:lango du:mapé
Pa:réko gerparu:ye,
Gerdídagdo germa:mílo
Pa:mapéi adíé gípagye.
Mé:namdéméi pangabru:la:ma
Sido turko amo:so
Asinbo mé:namdé bojebomdag
Pangabru:pé mí:daggom-
Adípé makin ma:mílo
Pa:namdé ajjio:bomdag.
Míngkídéméi ilaru:ma
Tani: turra du:dakso
Pa:nam pa:mang rísondo
Gípíla:ma:la adípé pa:pénamdém,
Míyin sukin ma:mílo-
Pa:ma:nam mí:dír sagídé
Asin ragom bagbomdag.
Méngkídéméi pangbru:pé mí:la
Pa:namém payekpé yegla,
Asin ara:bo mémogel
Lékoném pangkuru:ma:mílo
Asiné betkeyenémpé idag.
Mising Anu Lutad, Me:, 2025
