TUPTA KANÉ MIMÉ
Mg.Bhobo Dole:
MAC balennam iyé émna migommé lutad ludolokkéi ‘parti tikod’ mala lígang po:lok gumrag sangkampé sa:tagdung. Maker karka:mínsula luker kerdung. Omé-bírmé dolígla lupéma:nam agomlok do:pín pín lure:ka:mínsudung. MAC balennamdo Karmi:bí lébnyiko pangkabo. Sinying bima:bong émna réngam gomug bugdung. Dodnoudém domoma:bo anu migmoko kangkíyé émdung. Émpige:la Karmibí lékoda MAC kungke: tednam ma:nyiko ma:la dung.Odokki okolo kapiné amli: pidmílo aríg aidoji édém idung. Émpige:la adi:pé daktumnédé Karyumbí.Bí mímbírdokké minéso:pé réngam ager gerre dung. Mé:Jon asagé bím tolígdung. Odokki bí nérobnam agerém Karmibí gerbomkang. Lo:dípé jonnam ajondém do:mír ésarémpé angubomkang. Bí Kangkinma:na tani:émpé séu-bakor moropkang. Émdaggom aso aso:pé réngam asin ara:bo Karyumké moima:dé angkang. Réngamé bím balennamlok pertipé maropkang. Odokki Karmiké amigdo yubmi:ma:namko angkang. Bí do:lung “BLO” Pékkolimé ríksudange:la písí-pasapé luto “No Karyumké amindém” bhuter ko:rilokkém la:pagnam agerko gertoi.Sé murkong lí:língko.Sém la:to. Bí agomdok i:surko surmoyoka émna Pékkolimé yeru: bugapsumoto.
Lo:nyi loum lédulo “final bhuterlist”
dé lenkang. Pékkémpé agamné Karyumké amindé katomang. Bí agomdém ka:pa:sula taléng onam tani:pé dungkang. Ílí:kokki tukkulok tobla siya:la du:némpé dungkang.
Lo:níd lédulo ponsayod balennamlok lutad lupang lenkang. Mo:dum milung “Party ticket” dém lagimang émdaggom binam kama:la Karsoyi:mé bito. Bím takamé tupta kanné émna luyumkang. Émpige:la Karmi:bí tupta pisula kabdung ngo MAC do:mín sangkupé émtagan. Upsíng-go:nyipé mé:poné Karmiké asindo ongngopé gomma:kang. Émpidaggom bí appundém gonggabla dungkang.... ?
Mising Anu Lutad, Epril, 2025
