Mising Anu Lutad, Gugamuk, 17 August :- Mising Agom Kébang ba:lenboné du:pongarné Kébang Abu tedgénam Kin-go Migang, Agom Migang Porf. Taburam Taíd-ké (Angngoné) 5né po:sum longngé.
Mising Agom Kébang-ké dunggurki Mising Opín Kébangém jonsula silo Gogamukh Abotani lottalo Taburam Taíd-ké 5né Po:sum Longédém írga:pé mé:pa kumtomém kumla moí:rka.
Agom Migang Taburam Taíd-ké 5né po:sum longé:do Mising Agom Kéba:lok Kébang Abu Horinarayan Pe:gu, Kéba: Nébíng Sumeswar Kotak, Kébang Abu Oi Kalinath Panggíng, MAC-lok ru:tum Parmananda Chayengiya, po:péké MAK-lok nébíng Dimbeswar Dole:, Opín Kébang TMPK-lok Kébang Abu Tilok Dole, Dr. Anil Kumar Pe:gu, Raju Pe:gu, Yoksa Kuli odokké MAK-lok Mimang Lusar nébíng Dusyonto Noro-bulu Agom Migang Taburam Taídmé mé:pa:la mé:pa: kumtomém kumka.
Longé ager tarungki moí:rnam po:sum longédo Taburam Taídmé mé:pa:la "Agom Migang Taburam Taíd Mé:pa Tarung" émnam taru:do Mising Agom Kébang odokké Opín kéba:lokké midumé gídumsugela Taburam Taíd-ké gerngod ager kídí:dém odokké Tabu Taíd-ké Mising Agomsém du:yarmonam léga:pé ma:nam ma:nyi:dém, odokké bíkké Gomlab pílennamkídí:dém kapé turyarmopé lagidagji édémpiné ainé ainé tarung agerém írga:pé lusarbito.
