Mising Anu Lutad, 12 August :- Election commission of India-é mélo anupé ru:lenkunam ru:bang mo:légdok runggidnam itér ko:ri:dém réngamém tamkanbito.
Anupé ru:lenkunam ru:bang mo:légdo Dhakuakhana ru:bang mo:léglo du:téné Subonsiri Goan Panchayatlok 8 kopé ward-lok 20 kopé do:lungém aíké ru:bang mo:lég Dhakuakhana-lokkém la:paggela mo:lumpékampé du:témané Nauboisa ru:bang mo:léglo mélíkpé lagimang émna asom migomém la: ECI-ém mé:pa: do:jikki bitmnam taru:dém ECI éla: asom migomé ajjo:kosin méngkinbimapé méloko itér ko:ri: tamkannamdo po:pélokkébo du:né Dhakuakhana ru:bang mo:légdo ka:pasumala Subonsiri GP réngamé aglíngki ímmé dordanna silo édémpiné réngam jí:yudnam taru:dém tolíglamang émna ajéngém jé:namém ka:pa:dung.
Silo Subonsiri Patrichuk lotta:lo Subonsiri réngamé ECI-é la: asom migomé anu ru:bang mo:léglok itér ko:ri tamkannamdém aglíngkí ímmé dordanna motumnam tarungém ika:.
Dhakuakhana ru:bang mo:léglokkém Subonsiri GP dém Nauboisa ru:bang mo:léglo méa:lígnam taru:do Dhakuakhana ru:bang mo:léglok Ru:mi Nobo Kumar Dole:ké la: Lokimpurlok MP Prodan Borua:ké réngamém kinkurmoma:pé alagém ma:lígla gernam tarungé du:tédung émna réngamé lugé:nammém ka:pa:dung.
Nauboisa ru:bang mo:léglo Subonsiri GP lok 8 kopé ward-lok 20 kopé do:lungém métélígnamdém kapésin réngamé tolíglamang émna silo Ru:mi Nobo Kumar Dole:ké la MP Prodan Borua:ké moimangém amrongki a:manpé yedge:la kersin pílígla romna motumnam tarung inamém ka:pa:dung.
Subonsiri GP réngamké ugla du:né ímísém kangkinma:mílo sémpéyang bottayané ajéngém jé:yé émna silo Nobo Dole Go Back, Prodan Borua Go Back émna jé:la motumnam tarungém ika.
