NGOM LAGIDAG
Tuniram Médok
Ngom lagidag kangírné mo:písém
Sidok du:né turné-turma:né appíngém,
Ri:dorlok dorné asumo:dém lagima
Kekonpé bíkké:sin kémoko dung.
Ngom lagidag do:mírtokké mo:píso:pé
Lounboné Do:nyikémpin ruatko,
Lagidag ngom ga:nékémpin pontané asinko
Rokom tangarémpiné laornéko.
Ngom lagidag írga:né appíng agomko,
Kapila:né, abang-ba:nyi gombugo:lok-
Apir apirpé pirkumla:ma mé:tomko.
Lagidag ngom ésing-ílíng appí:lok geyomém,
Turdag among ni:tomdé yagema:mílo
Mo:písé kapé ase:la du:yen!
Ngom lagidag mé:tínsunam nékarlok-
Mé:pola binam asengko,
Lagidag ngom among-asiémpé ansi:néko
Do:nyi kémpiné kémokama:né ruatko.
Mising Anu Lutad, Ju:n, 2025
