MURI:NÉ GINMURA NO
Tuniram Médok
Péttang urratko yumra:ngé:lok
Dérmi néyiném bígabla,
Muri:né Ginmura no
A:doku agín bélamlog
Longkuné adíém béyuksula.
Ésaré dosugnam yabru:dog
Ka:pí: ka:sotpé ka:dung mo:te:pé:,
Longkoké muksubné do:mírto
Gipuném mí:boné ni:tomko
Parsa:pé madung anupé.
Do:mírtém bérsa:toném
Míkkíémpé iné mukkangé,
Ying-go:dung aí suapé,
Lígang írnam ésardo
Gíníndung nok kérang anínpé.
Rumngo kekon ko:jum ko:je:dog
Méng-gédanla la:nam amli:ki,
Sidbo abu odok Sidné anéké
Ili:ikamki pi:ro setur turdanla
Amliém líggottung arígé:lé.
Gumrag é:la Oi ni:tom
Simad madné ésardé-
Adí do:pidém boríksula,
Amo:sok gejigné takamém
Mí:po ayangko ase:lígdung
Arígém mé:bo boné longkído.
Mising Anu Lutad, February, 2025
