Ané Agomé Ngok Kangkinru:ngé
Tuniram Médok
Oné anéké napa:lo:pé
Ka:la ka:la lutípurukpé
Agomém lusa:tag
Ané agomé ngok kangkinru:ngé.
Oné anéké nyuglangki
Ngatursutag ngo,
Agom mullang bínyi:ki
Ni:yumla bísa:tag ngom
Ané agomé ngok kangkinru:ngé.
Ainéko iyemílo mé:pola
Agom mullang ki luyumtag,
Aima:néko iyemílo:gom
Ané agomí:ki ge:yirtag.
Tatpo tadané tadnonoma:
Lupo luané luno noma:,
Dérya:néko pa:yelang sémyang
Ané agomé ngok kangkinru:ngé,
Mé:dírko a:yegom kabnado
Mé:poko a:yegom yirnado,
Ané agomki mé:na-kabnama:mi'lo
Mé:tíng kaptíngsuma
Ané agomé ngok kangkinru:ngé.
Mising Anu Lutad, February, 2025
