Mising Anu Lutad, Oktubor 30 :- Silo Lokhimpur mo:dumlok Ghunasuti mo:léglo du:né Miri Jiyori Kolej lottalo Mising Agom Kébangé ki:ni kisapé 39né Mising Agom Longé moí:rnam tarungém lo:nyi ager tarungki 30 éla: 31 oktubor 2023 longkí ara:lo moí:rdung.
Lo:nyi ager taru:do MAK-é mising agom gomlab, dírbí-dírlab í:r-pongkírra gímonam légangé aré kané kébangém silokokké ba:rubdung.
Silo rokom adído lé:tom tomsangka Mising Agom Kéba:lok Kébang Abu Mg. Horinarayon Pe:gu-bí. Odokké longé ager tarung dungkampé Agom Migang Taburam Taid mé:pang lujar tarungém MAK-lok Abu Horinarayon Pe:gu-bí lupo lujarboka. Odokké gomlab anka:mínsunam tarungémsin írga:pé iboka.
Ménggébdanna lusetpénam lutaddé sémpé 39né Mising Agom Longédém tolígla MAK-é Agom Migang Taburam Taid-ké DUMSÍG LÍ:MANG MOGE:nam tarungkosin ru:séktung. Édé DUMSÍG LÍ:MANG-dém yampo 31 Oktubor longkílo Ohom mimo:sok kin-go mirung Dr. Ronuj Pegu-bí rokom 10 adí:do moge:yé.
39né Mising Agom Longédém írga:pé aré kané agomém lupo lujarla ludopé bojerungko mising réngamlok pin-yo burné mité minomém goglíktung.
Mité Minompé Ohom Migom Kin-go Mirung Dr. Ronuj Pe:gu-mé odokké Ménggésunam Minompé MAC-lok Ru:tum Mirung, Mg. Poromanondo Sayengia, MAC-lok Abu, Mg. Sunil Kr. Pe:gu bulum goglíggela:sin Mising Agom léga:pé aré kané agomém lujarla luboyépé émna Goglignam Minompé Dr. Ghonokanto Lagasu, Po:péké Kébang Abu, MAK, Dr. J.J Kuli, Po:péké Kébang Abu, MAK, Mg. Gubindo Taid, Po:péké Kébang Abu, MAK, Mg. Horendronath Dole:, Po:péké Kéba: Nébing, MAK. Mg. Prodan Boruah, MP, Lokhimpur Lukosobha Balen Mo:lég. Mg. Nabo Kr. Dole:, Ru:boné Ru:bang Balen Mo:lég Dhokuakhana. Mg. Manob Deka, Ru:boné Ru:bang Balen Mo:lég, Lokhimpur. Mg. Bhubon Pe:gu, Ru:boné Ru:bang Balen Mo:lég, Jonai. Mg. Biju Pe:gu, E.M, MAC, Mg.Sumit Sataon, DC. Lokhimpur mo:dum, odokké APD Kolejlok Ru:tum Dr. Sodanondo Pa:yeng-bulum goglíktung.
Odokké opín kéba:lok takam kébang abu/kéba: nébíng ope:yem goglíggelasin Agom Migam Taburam Taid-ké érang Mm. Basonti Taídmé goglíktung.
1985 dídagdok 30 Oktubor longkílokké moí:rbomna gínam Mising Agom Longésém mising du:té:lo silo takam mising réngamé dokké bangke agom kébang ope:lok igurki atí atí mo:taglo í:r-pongkírpé moí:rnam tarung inamém ka:padung.
Su:k anu sí:sang opeyé Agom Migang Taburam Taid-ké lunam agom - "Misingge:la Mising agom mé:boma:nédé, Mising agom jarsang ka:langka émna mé:ma:nédé aro Misi:mang, bík asigdé aíkédaggom asindé amikélo kolígnammé." émnamdém kinsula aíké mising agomki luposunam tarungém ka:beksudung. Sí:sang opeyé aíké agomki luposunam tarungém ka:pa:sunamdé a:péné longé kídídokképé ainé ager kangga:pé iyé émna ngolu mé:la:do.
