Mising Anu Lutad, Sept. 11 :- Osom mimosok karbi mo:puné bulukké ané agom karbi agomdém 8th schedule ara:lo tolíkpé lagidag émna koradla du:do adí:do aipé mé:dírpenam agomko a:dung.
Silokokké "Ohom Hitkalin Odhibekhon" ba:nam taru:dok taunam lulatka:mínsunam taru:do BJP Ru:bo (MLA) Bidyasing Ingleng-ké tadnam taunamdo Osom-sok ru:tum ru:mi Dr. Himanta Biswa Sharma-bí bérogo:pé lubito Roman abígém topagmílopak 8th schedule ara:lo Karbi agomém tolígyé.
Roman abígém topaggela Bharod mo:rumsok du:né akonumko abígém toríksumílopak karbi agomdé 8th schedule ara:lo gía:yé. Roman abígém topagma:mílo migom ope:ésin 8th schedule léga:pé agerém gerdumsulama:yé émna ru:tum mirung Dr. Sharma-bí bérokpé lubito.
Lutétpénam abangko sémpé Karbi mo:pun manggom karbi agom kébangé oko abíkki adnam panamém iyén mangom oko abígém bulu toyé:n édé bulukké aíké agomé. Ngolu migom kisapé 8th schedule ara:lok agerém odolopé gerdumsulama:yé édílopé Roman abígém topaggela Bharot mo:rum runggo:lok tolígnam abígém toríksuma:yéji. Kapilané roman abígém supaglopé 8th schedule ara:lo tolígnam tarungém ka:pama:da: émna ru:tum mirung Dr. Himanta Biswa Sharma-bí lubito.
