Mising Anu Lutad, Obonori, 05 September :- Mising opínsok abu kébang Mising Ba:né Kébangé dobur uyu:lok ilí-ikam do:ro malenkunam légangé do:lu: do:lu:lo kébangém ba:dung.
Silo Subonsiri Goan Panchayat ager gerko okumlo Mising Ba:né Kébangké goggurki Obonori mo:taglok opín kébang TMKP, MMK, TMMK dumsula mising réngamsok lendo a:doeokkébo igé-mogé:la gínam Dobur uyu:ém mising réngamé lekkopé kapé dobur uyyém burpé lagidagji émnam lugéngki kébangém bangka.
Do kéba:do obonori ara:lo du:né bangkí bangkí do:lu:lok Ga:m odokké do:lu: bomboné ménggésunam migomém goglígla Ba:né kébang ki:ni: miba:lokké mélígnam - uyu utpong, Ilí ikam ka:si mosí:né ope:yé do:lung tani:kídídok lédulo nérkíkpé lupokamínsuka.
Bangkí bangkí do:lu:lo aí aíké ilí-ikampé sílopé kapé doburém burra du:ji édémbulum lusarkamínsunam tarungém lupomínsugela Ba:né Kébangé lomdanna dobur uyu burnamsém longé akkongkolo burpé lagidag émnam tarungko ru:ségyé émnasin kinmoto.
Lutépénam agomdé airupéi mé:mipénamko silo:lopé misingé dobur uyu:ém burdaggom angu angu longé, longkí:lo inamém ka:begdung odokkésin ake: do:lu:lo e:g, porogém aba:ko burtélígnamém ka:pa:ng-ga:lok Mising Ba:né Kébang (MBK) é lomdanna lékkopé longéo:kolo inam tarungko ru:ségyé émna MBK-é réngamém kinmodung.
Dobur uyu, dodgang, midang atí atí ilí-ikam kídí-dém mising opínso aíké ilod gílotki kapé turyarra du:mo:pé lagidagji odokké édémbulu ido:do murkéngkanpé kapé ru:la bojeko ma maurkongém murpagma:pé iledla:yéji édémsin ru:ségyé émna MBK-é réngamém lupa:bidung.
Siloké sé dobur uyyém mising opín kisapé kapé lékkopé burpa:yéji édé lupomínsunam taru:do mising opínnok ménggé tadgénam migom gomlab migang Kalinath Panggíng, Dr. Pabitra Kumar Pe:gu, Ekolobyo Ga:m, Raju Medok, Probhat Mili odokké Subonsiri Panchayat-lok Abu Khanindra Medog-bulu dungngai.
