Mising Anu Lutad, 18 August :- Silo 30 August 2023, Uttar Lakhimpur BAK, Boginadi BAK, odokké Boginadi Bangke MBK, TMPK, MMK, TMMK, MDK-ké Dumsula igur mogurki Gomlab Migang Po:sum Tarun Ch. Pa:me:gamké 41né MÉ:PA: LONGÉM Boginadi Se:di me:lo lottalo Moí:rka.
Ager tarung dungkampé Rokom- 8 adí:do-Lotta mopung-ipung, Rokom- 9 adído- Mé:pa: Kumtom kumgod, Kumgodboka - Mg. Lileswar Kaman Ex. Z. P. C. Rokom- 9.30 adi:do- Gomlab Migang Pa:me:gamké aminki ísíng lenam. Legodboka Dr. Rajen Pegu Retd. Joint Director, Medical Deptt North Lakhimpur. 10 adído- Gomlab Migangké ni:tom, mé:tom, do:tom posar-mosar iropka. Odo Lugurboka- MAK lok po:péké Abu Oi Mg. Gubin Noro. Bí aipé írga:pé Tarun ch. Pame:gamké Do:yar, Do:sok, Gomlab agomém lubika.
Odo arangí:do Mé:tomém - Manturam Taíd, Kalpana Doley Panging, Nempuli, Binapani Pegu Milibulu írga:pé pokanna í:r moka. Odokké Mimé Pronita Taídbí Tarun Ch. Pame:gamké Turying agomém lutégla Ni:tomém mola aipé í:r moka. Lupo-lujarrém Lugurboka - Mg. Rajib Kaman lang Mg. Monturam Taid binyi anyiyé.
Longé-12.30 adí:dokké Gomlab Migangké Turying Do:ying bélam Sígla lupo-lujar Kébangém ba:ropka. Kéba:do Kungke Tedgéboka ULBAK lok Abu Mg.Triranjan Taid, odokké Boginodi BAK-lok Abu Mg. Mohan Pa:yeng-bí. Odo kéba:do Tarun Ch. Pame:gammé mé:pa:la bík ni:tomkokki mogur ni:tomki mogurboka. Kéba:dém Lupo lujarém lugéboka po:péké MAK lo ki:ni kéba:lok nébíng Mg. Dimbesor Dole: migombí. Bí Tarun ch. Pame:gamké gerngad agerém ngolu gersedla agerém gerpa:yé émna luboka. Oko opíndé do:yingém adgabla gíma:yéji bí runggo mirungpé idaggom yammíné kamang émnasin lusa:la béjérungko agomém luboka.
Lutégla lugébodopé goglignam Minom-
Mm. Bina Pa:yun Taid, odokké Mm. Jeuti Pa:me:gam Pathari bínnyi aipé araipé turying agomém lubika. Tarum Ch. Pame:gamké ojubla onam omé Mm. Jeuti Pa:me:gam Pathori-bí bík ba:bubí miro Tani:ko émna lusa:la ba:bubí kapé aya:daga:ji dé appíng agomém asindokkí lusarsuka.
Mé:tínsula goglignam Minom-
Mg. Anil Pa:yeng, G.M. MAC Mg. Devananda Mili, Abu MBK NL Dr. Debo Kt. Pangging prof. Girls Collage NL Mimé-Tuladoi Pa:yeng Taid, Ager ajon MAK Mg. Podmeswar Pa:me:gam Ex. Z.P.C. Mg. Kuladhar Pe:gu, Mo:pun bulu kéba:dém írga:boka. Bulusin Tarun Ch. Pame:gamké Turying agom odokké Mising opín angu opíné kapé bík po:sum longédém igurpénamén dé agom kí:dídém lujar boka.
Mo:pun Kuladhar Pegu migombí tu:tok kokki Tarun Ch. Pame:gamké tomgésunamé émnam lé:tom tíksar ni:tomdokki motsa:la aipé í:rboka. Odokké Boginadi mo:taglok méngésunam Biblap Taíd, Bhupen Chungkrang l, Lakhimpur bokké Aneswar Pegu bulu odokké atí atí taniyé gídumsula kébangém írga:pé moí:rboka.
Lutad Tíkumsuné - Monturam Taíd
