SIDO A:NÉKO DU:YA:MÍLO
Tuniram Médok
Sido a:néko du:ya:mílo
Pédongé pu:mi asilo
Durbutsula ursuya:pé.
Yulad yuné ésaré
Mukkang apomém goksula
Anseko sebosuya:pé.
Asiné bedma:ya:pé attung attu:pé,
Sakkebné kénongém
Po:lo ríga:lo yogmoma:ya:pé.
Aín émpin aríglo
Émé ugné amigém
Miga:la ka:mo ma:ya:pé.
Sido a:néko du:ya:mílo
Mímbír aríglok,
Inggango:né pokídok
Angkir aré yokpagma:ya:pé.
Mé:bo mé:mín sunamlok
Ayir gípí:man ngasoddo
Tumbo tapungém mudmoma:ya:pé.
Sido a:néko du:ya:mílo
Ago golung yirnamé
Turnamsém rotbomma:ya:pé.
Opan pékog koga:né
Ru:bené arígo:lok yirnamém
Édílo:sin tadbeg ma:ya:pé.
Mising Anu Lutad, Julai, 2025
