Mising Anu Lutad, Mars, 3: Mising Agomki po:lo-po:lo:lo lenné “Mising Anu Lutad” lutaddém silo Mising Anu Lutad bílenné ope:ké gergurki odokké Guati Bangke Agom kébangké kédumsunamki Guati bomje lu:jarlok Borbari mo:taglo du:né Pe:gu Potin Kumsung lottalo réngam kanggalo írga:pé tamsarto.
Longé ager tarungki ba:nam Tamsar Kéba:do Mising Anu Lutadlok ru:tum nébíng Topon Lalké lugébonamki Mising Anu Lutad lutaddém írga:pé tamsarbito mising agom kéba:lok ki:ni miba:lok kéba: nébíng ame: Dr. Konok Sondro Dole: migombí. Kétog 1 atídokké ba:nam Tamsar kéba:dém Guati Bangke Agom Kéba:lok kébang abu Tuleswor Pe:guké abu kungke tedgurki ai kampo:pé Tamsar Kébangém ba:pírboto émna kinnadung.
Dé Tamsar kéba:do Guati bomje lu:jarlo du:né Mising agom gomlab mo:pílok tadgénam gomlab migang lukanpé - Horendro Nath Dole, Sitaram Dole:, Dr. Abhijit Pa:yeng, Krishnoram Mili, Oboni Mili, Bilas Sondro Dole:, Bishnu Kumar Pegu, Deben Pe:gu, Arun Kumar Gam, Budheswor Pe:gu, Hira Pe:gu odokké mopun Dharani Tawo bulu du:mínna Mising Anu Lutad tamsar kébangém airupé írga:moto émna kinnadung.
Tamsar kéba:do Guati bomje lu:jarlok gomlab migang ope:yé airupé aré ka:né do:yingé bojeko lubito dokké mising agom gomlab turyarra du:monam léga:pé anu sí:rum ope:yé su:k anu adí:ém ka:la sémpiné Lutad la:lennam gernam agerém aséng asé:líggela geryarbotíladopé ainé luyirémsin lubito émma kinnadung.
Mising Anu Lutad ope:lokké Mg. Raja Pe:gu, Rohim Kaman dokké Pranjol Dole:bulu daggursula ai kampo:pé siloké tamsar kébangém ba:pírboto.
Lutétpénam lutaddé sémpé Mising Bangke Agom kébangé Gomlab migang Brigumoni Kagyungké mé:pa: longé moí:rnam léga:pé ba:nam kébang ara:do Mising Anu Lutad tamsar kébangém ba:téboga:lok Anu Lutad ope:yé bulum asin aséngém asé:líkto.
