Mising Anu Lutad, Jan, 07 :- Anu Dítaglo Ohom mimo:lokké Mising Réngamlopé aipé geyumné lutatko. Osom migomé silo mimong kebine:d (Cabinet)- taru:lo Mising réngamlopé aipé mé:yumsupénam lutatko lupa:bito. Mising Aí Ka:sí:sunané Milung (Mising Autonomous Council) -ém Bharot mo:rumlok Runggo-lo a:té:monam légangé Bharot ki:ni migomlo:pé tolígnam ru:ségém sékto émna kinna:dung.
Ohomsok aumkopé mo:pín lukanpé Mising, Rabha odokké Tiwa-lok Aí Ka:sí:sunané Milungém Ohom migomé mo:rumlok runggo-lo a:té:monam légangé ki:ni migomlopé ohom migomé aíwé Proposal-ém bisuyé émna siloké kebine:d taru:dé kinmodung.
Mising, Rabha, odokké Tiwa mo:pín kírídok Aí Ka:sí:sunané Milungé runggolo a:témílo murkong pe:le:lok (Finance department) murkéng ager gerranamém bojeko payé. Dokkésin ka:sí:la:nam (Administrative Power), kin-go (Educational) atí atí pe:le:lo bojeko murkongém pa:layé.
