Mising Anu Lutad, Dec 7 :- Mising Agom Kéba:lokképé la: mising réngamképé airupé írgané lutatko.
Silo Ohom mimo:sok kin-go mirung Dr. Ronuj Pegu-ké tedgurki Ohom Prohahoniyo Podadhikari kolej kéba:bangko okum lottalo kin-go pe:lelokké kínggírupé topénam kébangko bangka.
Dé kéba:do Ohom mimo:sok mo:pín agom kébang opeyém gokkunsugela State Council of Educational Research & Training (SCERT) lédulo du:pumsugela pobug pogolo aíké ané agomém poyirnam tarungém ilígnam légangé migomé kébagném bangka.
National Education Policy andé:pé NEP dok dungkampé pobug pogolo néríbokké narépé ané agomki poyirnam tarungém ilígnam légangé Ohom migongé mo:pín agom kébang opeyém lukanpé Mising, Rabha, Tiwa, Deuri, Karbi, Dimasa, Mar odokké Garu mo:pínnok agom kébang ope lédulo bérokpé ru:pítkamínsugela a:péné New Accademic Session (Anu Kin-golok Mibang) 2024 dítagdokké mo:pín ané agom ope:lok Mising, Deuri, Rabha odokké Tiwa agomkídídém (medium of instruction) Poyirnané agompé iyé émna tarungém migom lédulo tarungém ru:sekto.
Migom lédulo ru:ségnam dé taru:dém appíng mo:pín agom kébangé mé:pola toríksuto. Dokké Ohom mimo:lok kin-go mirung Dr. Ronuj Pegumé la: Ru:tum mirung Dr. Himonto Biswa Sharma-bínnyím atékpé asin aséngkosin asé:líkka.
Pobug pogolo poriné ko:ko:néng kídíngém aíké ané agomki poyirra bulum ainé kin-go:ko binam légangé siloké sé taru:sém ru:sékto.
Pobug pogolo ané agomki poyirsugela léduké botta:né ape:kídído angu agomki porinam tarungém ru:daggom étsango:pé atí agomém bagémpé kinkurladag émna NEP-é bérokpé lubikampé supag Ohom mimo:sok du:né takam mo:pín ané agomém migomé pobug pogolo ilígnam tarungém silo runggiddana ru:sékto.
Siloké sé do:pín dungkéng adíso Mising mo:pínlok agom kébang Mising Agom Kéba:lokké Kébang abu Horinarayon Pe:pu, kébang abu oi Kalinath Panggíng, Po:péké kebang abu Gubindo Taíd, Kéba: nébíng Sumeswor Koptak, Lutat lusar nébíng Dusyonto Noro, ager ajon Royal Pe:gu, Yoksa Kuli odokké Jipen Dole:bulu du:té:mínka.
