Mising Anu Lutad, Septembor 25 :- Mising opínképé aipé mé:po:pénam lutatko. Ohom mimo:sok ansí:né mo:pín mising mo:pínnok opín kébang TMPK igurki ibugdann Mising Olympic (Olimpik) ipé émna tarungém ru:séktung.
A:péné 27, 28 éla: 29 oktubor 2023 longkílo Junai mo:léglo ipénam "Mising Olympic" légangé gíbídné 24 Septembor longkílo Silapothar mo:léglo du:né Modhyo Sisi Tongani mo:léglok piporguri iman so:manko lotta:lo í:r-pongkírpé tomsarnam tarungém ika.
Odo taru:do Olimpik (Olympic) -dok Theme Song "No Gígébomílo" -dém moí:rropka TMPK-lok Kébang Abu Migang Tilok Dole:bí. Olympic theme song "No Gígébomílo" émnam ni:tomdok agom aléb odokké torí:dém Sanjib Dole:bí la:lentung. Ni:tomdém tomtung Chandra Kumar Patgiri, Binud Bio Pegu, Bhaskar odokké Violina Dole:bulu.
Odok lédupé Mising Olympic-dok kangga "Bírbíg" dém tamsarka Mising Autonomous Council-lok GC Migang Protab Taye-bí. Olympic-dok ímí méyom ba:nodka TMPK-lok yari nébíng Migang Rajib Dole:bí.
Mising do:lung ara:lok du:né ko:ko:nélok kinjo:ném/ijo:ném mo:píso léngkannam légangé odokké do:lung ara:lok yari mojéné ko:ko:néngém balennam légangé Mising Olimpik tarungém ru:séktung.
Yari molasin kapé aíé turna:né bélamko la:lensula turra:doji dok léga:pé Mising Olympic taru:sém ru:lentung émna réngamém kinmoto TMPK ki:ni miba:lok Kéba: nébíng Shan Do:nyi Panggíng-bí. Dokkésin mising réngamsé kapiné tarungko ru:mílo aíé torasula du:layéji dokké sí:sang opeyémsin kapé réyampé ainé réngam lédulo du:bo-dagbolayéjí édémpiné yarungémsin lomdanna ru:segyé émna bérokpé lukanbito TMPK Nébíng Shan Do:nyi Panggíng-bí.
Mising Olympic-do yari ape: 9 kopé ankamínsunam tarungém ru:tung émna kinnadung. Dé Olympic taru:do ko: éla: ko:néng pe:le angu angupé du:ye. Annyi pe:le:do 16 éla: 19 turtag kéígné ko:ko:néngé anaka:mínsunam taru:dom imínnayé.
Mising Olympic-dok yari ape:kídí:dé sémpé dung
1 Sprint (Race) (Dukka:mínsunam) 100m la: 200m
2 Half marthan (Marthan Dugnam) (21,0975)
3 Javelin Throw (Jeblin Gékamínsunam)
4 Discus Throw (Diskas Gékamínsunam)
5 High Jump ( Oudné Sumkamínsunam)
6 Long Jump ( Arainé Sumkamísunam)
7 Swimming (AsinBangkamínsunam) (50m freestyle, Butterfly 100m)
8 Archery (i: épug Appka:mínsunam) (U -19 =50 U-16=37)
9 Dogdíg (U-19=100m, U-16=50m)
A:péné 2 oktubor longkílokké do:lung ara:lo, 14 oktubor longkí ara:lo mo:léglok mo:lég toréblok pagyané anka:mínsuném balennam tarungém iyé. Dokké mo:dum ara:lo mo:dum toréblok pagyané anka:mínsuném balennam kídí:dé Mising Olympic-dok anka:mínsunam taru:do imínnayé.
Anu adíyém ka:mi:gela opín kébang TMPK-yé sémpiné ainé taru:ru:namsém appíng mising réngamé mé:líksula a:ng asin ara:bokkesin írroi émna jé:dumsunamko anbegdung.
Lutompénamdé sémpé Mising Olympic-dok yari ijo:mojo:yané ko:ko:néng kídíngém MAC, appíng mising opín kébang odokké mising réngamé dumsula bulum murkong aman binam tarungkosin ru:tung dokké bulukké yari aro-tamkan (Game certificate) dokki migom agerkolok la:nam ankamínsunamdosin jubdopé (valid) dopé migom lédulo ru:ségyé émna kinmodung.
Mising Olimpik taru:do opín yélam sapka:mínsuma:pé appíngém rélékpé gídum ka:dumsulangka émna igurboné opeye kumpadung.
